Meel uma kaco kulmiye inta uu hor fadhiyo kaasi!?

Waa xaqdarrooyinkii hore oo kuwo kalena loo sii xambaariyey iyo carruurtii siyaasadda ku cusbeyd oo sasabasho lagu seexiyey! Sidii Oday Siilaanyo rabay ayuun bay u dhacday. Sow maahin? By: Proffesor

Muuse Biixi, Hebel Xirsi, Hebel Aare, professorro cusub, Drs, Aqoonyahanno kale iwm. Ayaa guddoomiyennimada iyo guddoomiye-ku-xigeenka Kulmiyue u soo sharraxnaan doona oo Siilaanyo la tartamaaya... Waxaas oo dhammi waxa ay noqdeen biyo col dhaanshay. Markii Oday Siilaanyo la hor tegey. Sidii ay awalba haan jirtay. Aniguba waan yaabayay, "Samo-kaab bee Deero Dili "! Waa la iska arkaayey inaan sheekooyinkaas jilicsan Odayga lala hor tegi karin. Aniguna waxaan lahaa, "Faan Badanaa", Yaa Ku Dhaca'.

Sidoo kale, hore ayaan ugu xiiqay inaan dhangaagaalaha iyo dhaqan-celiska ka dhaadhiciyo inaan Oday Siilaanyo cid meeshan ka dhaqaajineysaa jirin - illaa uu dhinto! Arrintaas oo muddo hore iyo waqtigii halgankii SNM la ogaaday.

"Aniga Iska Daalaye Dheguhu Uma Daloolaane"! Qaasim (AHUN).

Hadalkii oo kooban, macallinku illaa galool hoostii ayuu tabahan iyo xeeladahan
dahsoon ee xoogga badan wax ku soo maamulayay oo siyaasadda keligii-talisnimada, sida tartameyaasha madaxa la isugu dhufto ee iyaga la isugu jebiyo sidii lafo geri, sida siyaasiyiin-ku-sheegga kale, askarta, codadka dhangaagaalaha/Dhaqan-Celiska iwm, loo kala xado ama loogu hanjabo, sida dhaqaalaha, lacagta, laaluushyada iyo 'dhuuniga' wax lagu kala socodsiinaayo loogu kala qariyo gacan bir ahna loogu maamulo, sida kursiga had iyo goor loogu guuleysto... Arrimahaas oo idil odaygu jaamacado sare ayuu uga soo baxay!

Sidaas darteed Oday Siilaanyo = Ina Yey II..

Waagii SNM ayuu Siilaanyo carbis adag oo waayo-aragnimo fiicani ku dheehan tahay ka soo qalin jebiyey sidii uu saraakiishii SNM madaxa isugu garaacaayey. Illeyn Korneyl Siyaasad dhex galay. Waa Ri' Kildhi Madaxa la gashay e'!

Markaas, ma askartiisii ama innamo yaryar ama odeyaal kale oo shalay qurbaha iwm ka soo hangagaaray ayaa wadaadku biyo u kabbanayaa? Amba waan yaabayay markaan maqlay Muuse Biixi iwm ayaa guddoomiyenimada kula tartami
doona, oo waxaan is weydiiyey "Oo tolow Muuse Biixi miyuu waashay! Sidee buu macallinkiisii weynaa ee illaa Qaaxo, Calan Cas, Dagaalladii sokeeye, Dawladihii Tuur & Cigaal...Maryo Alool. Illaa maanta.. Intaas oo dhan wadan jirey. Sidii rabbaayadda oo kolba 'shaqo' u diri jirey ee indhaha iyo dhegaha u ahaa sidee ayuu Muuse Bioxi maanta arrinkiisa u diidi karaa - tartan maamulna hadalkiisaba daaye"! "Tolow Muuse ma kursi ayuu u waashay oo uu waxaas oo idil ku illaaway?" Markaasaan haddana xasuustey oo idhi, "Oo huunno, sow abaal-laawe khasaare Aabahiis maahin"!

Hadal iyo dhammaan, meeshan waxaa ka caddaatay dhowr arrimood oo horeba loo tuhunsanaa. aana la arkayay:

1) Oday Siilaanyo inuu yahay ruug caddaa ku xeel-dheer keli-talisnimada iyo arrimaha la xidhiidha oo idil! Afweyne, Ina Yey iwm. Waxay noqonayaan carruur af-barad ah marka uu Odaygu yimaaddo madasha rag isku hayo ee uu indhahana soo buurto! Allahu Akbar.

2) In Muuse Biixi iwm. Ay weli ardeydiisa yihiin oo markuu macallinku 'aamus' ama 'hush' yidhaahdo aan dabadii la hadlin, sidii ardeyda yaryar oo macallinkooda ku yara edeb darrootay ama ku ciyaartay! Dhowaan-baradka kale oo dhammina meesha ayuu ka qaxaa sidii lo' libaax xerada ugu soo galay.

3) Inuu Siilaanyo weli Ri'yaha Kildhiga madaxa kula jira siduu doono ugu talin karo, meeshuu doonona u hoggaansan karo. Bal eeg go'aanno-ku-sheegga la gaadhay:

i) In aan Oday Siilaanyo kursiga guddoomiye/madaxweyne weligii lagula tartami karin - inkastoo uu ilaa Qaaxo ku soo fadhiyey, marar baddanna u ballan qaaday inuu kaaliyeyaashiisa/gacan yareyaashiisa abaal-marin ugu wareejin doono!

ii) Had iyo jeer, inuu Siilaanyo dooran karo guddoomiye-ku-xigeenkiisa oo kolba
askarigii ku yara dhego adeyga, sida Muuse Biixi, C/raxmaan Aw Cali, Dhego Weyne..Max'ed Kaahin, uu maqaaxida debedda uga tuuro, askari kale oo cusubna qorto sida Seylici iwm.

"Cidna Kama Qarsoona In Uu Kulmiye Yahay Maqaaxi Uu Siilaanyo Shaah Uu Soo Kariyay Ku Iibiyo"!

4) Odaygii Rreer Burco wuxuu arrintan ballan qaadyada beenta ah, badhi-furka tirada badan iwm oo kale ka yidhi, "Allah Ma Arrafo Ayaan Ka Ilbixi Waayey"?

Carruurta siyaasadda ku cusub iyo Ri'yaha kildhiyada madaxa ku sita wuxuu Siilaanyo weli ku maaweelinayaa "Muddo X Markaan Madaxnimada helo ayaan xilka wareejin doonaa".

1990kii ayey aheyd markuu ku ballan qaaday inuu maamulka SNM iska wareejiyo ee meeday?

1990s ayey aheyd markuu ku ballan qaaday inuu kursiga Calan Cas qof kale uga degi doono ee meeday?

1990kii ayey aheyd markuu ku ballanqaaday inuu kursiga Kulmiye ka dego oo weliba uu ku wareejiyo Musharrax Beelaha Hargeysa ka soo jeeda ee meeday?

Waa sababtaas sababta uu Muuse Biixi Iyo raggiisu maanta la xanaaqsan yihiin.

Hore se waxaa loo yidhi. "Labo Xaaraan Ku Heshiisaa, Xaqa Ayey ku Collow Baan iyo Bohol Hadimo Ha Qodin, haddaad Qoddana Ha Dheerey, Ku Dhici Doontaana Mooyee".

Markaas, Ri'yihii kildhiga madaxa ku sitay boholo dhaadheer oo ay weliba iyagu gacmohooda ku qodeen ayaa maanta ku daateen oo madax-madax loogu guray ee waa in ay xanuunkeeda xejistaan!?

Madaxweynenimada oo bil gudaheed guddoomiye-ku-xigeenja 1aad Muuse Biixi, Seylic iwm lagu wareejiyo? Waa taas carruurtii aan sheegayey ee siyaasadda ku cusbeyd sa sabasho lagaga seexiyey!

Sheekadan 'bil gudaheed' waxay ku saleysan tahay laba arrimood:

i). Been cad, khiyaamo iyo maaweelin, sidii Brown iyo Blair!
ii). In Siilaanyo kursi jaceylkiisii soo jireenka ahaa uu 'waalli' isu beddelay oo uu odaygu rabo inaanu degin ilaa uu 'Madaxweyne' noqdo. Markaas oo aanu degi doonin sida Rayaale, Ina Yey et al! "Ilaa Kulmis Waa Keligii-Talis Soo Fadhiyey Oo La Kari Waaye" Laakiinse soo qoysataye ee yaa u xiiraya! No Card! Waa turubka Baashe Baashe kaga qaad.

5) Inaan oday Siilaanyo hanjabaad yar iyo goolaaftan jilicsan waxba lagaga qaadi karin sida; Hebel, Reer Hebel, Degaan hebel iwm. Ayaa Xisbiga Kulmiye ka dareeri doona! Oo 'Cadowga' ku biiri doona. Bajintani waaxay iusaga uga dhiganm tahay "Hooyooy Xuux" oo Odaygu booli-xooftooyinkii cilmiyeysnaa ee Afweyneba dheg umuu dhigi jirin. ( Inkasta oo uu feejigeysan jirey intuu meel
dheer u yara faagto.

6) Inaan UDUB cidi beddeli doonin, ugu yaraan, 10ka sano ee soo socda waayo wax la loollama waxaa ugu dhowaa xisbiga Kalalumiye ee maanta sida xun u god galay ! Allah.

Rayaale iyo Saaxibbadii Nasiib Badanaa Ma Waraabayaal baa mise ciddi coomaaddey Sitaan? Guul hawl yar oo tii ay xukunka ku heleen ka sii dhib yar ayaa UDUB irridda uga soo gashay iyadoo ordeysa.

Tii Somaliland aheydna rajadeedu waxay maraysaa halkii meydkii gaadhiga ka dhacay ee uu ninka Ciise ku dhawaaqay "Hadduu Meydki Sii Go'ay" !

Ugu dambeyn, arrimahaas oo dhan waxaa ka sii daran iyadoo xaq darrooyinkii hore ee lagu heshiiyey kuwo kale oo ka waaweyn lagu sii kordhiyey, sidii habartii xaabaleyda aheyd!

Allahayow. Maxaa meeshaas miinooyin ka qar-qarxi doona. AIlaahayow aanay magaalooyinka iyo waddanka nagu gubin.
 

Aamiin
 

Professor, UK.
professor1@hotmail.co.uk